लागु पदार्थ सेवन गरी मोटरसाइकल चलाउने ५ जनालाई ट्राफिक प्रहरीले नियन्त्रणमा लियो

In Headlines
June 10, 2023
Sushil Paudyal

जेठ २७, २०८० शनिबार

लागूपदार्थ सेवन गरी मोटरसाइकल चलाउने ५ जना चालकलाई ट्राफिक प्रहरीले नियन्त्रणमा लिएको छ ।

ललितपुरको बाँडेगाउँमा शुक्रबार गरिएको चेकिङका क्रममा पक्राउ पर्नेहरु बाँकेका २२ वर्षीय अंकित महत, अर्घाखाँचीको मालारानी गाउँपालिका- ६ का २० वर्षीय अनिल बस्नेत, ललितपुरका २३ वर्षीय अमित कार्की, बाँडेगाउँका १८ वर्षीय एलिस महर्जन र मोरङको विराटनगरका २७ वर्षीय सुमन खड्का हुन ।

नियन्त्रणमा आएका सबैलाई आवश्यक अनुसन्धान तथा कारबाहीका लागी प्रहरी वृत्त सातदोबाटो पठाइएको छ । नेपाल प्रहरी अस्पतालको प्राविधिक सहयोगमा काठमाडौँ उपत्यका ट्राफिक प्रहरी कार्यालय, ट्राफिक प्रहरी परिसर सातदोबाटो, लागुऔषध नियन्त्रण ब्युरो र प्रहरी प्रभाग बाँडेगाउँबाट खटिएका संयुक्त टोलिले शुक्रबार ललितपुरको बाँडेगाउँमा सवारी साधनलाई चेक गरेको थियो ।

काठमाडौँ उपत्यका ट्राफिक प्रहरी कार्यालयका प्रवक्ता प्रहरी वरिष्ठ उपरीक्षक राजेन्द्र प्रसाद भट्टले सवार सवारी साधनका चालकले लागुपदार्थ तथा मादक पदार्थ सेवन गरेको शंका लागेमा यात्रुले तत्काल नजिकैको प्रहरी कार्यालय , ट्राफिक कन्ट्रोल रूमको हटलाइन नम्बर १०३ र प्रहरीको हटलाइन नम्बर १०० मा खबर गर्न अनुरोध गरेका छन्।

तपाईंको प्रतिकृया