सोमबार, जेठ ८, २०८० ॥ गुजरात जायन्ट्सले इन्डियन प्रिमियर लिग (आइपिएल) २०२३ को लिगको अन्तिम खेलमा रोयल च्यालेन्जर्स बेंगलोरलाई ६ विकेटले पराजित गरेसँगै मुम्बईलाई फाइदा भएको छ र मुम्बई इन्डियन्स प्लेअफमा पुगेको छ । यदि उक्त खेलमा गुजरात पराजित भएको खण्डमा मुम्बई प्लेअफमा पुग्न सक्दैन थियो ।

जितको लागि १ सय ९८ रनको बलियो विजयी लक्ष्य पछ्याएको गुजरातले १९.१ ओभरमा ४ विकेट गुमाउँदै पूरा गर्यो । उक्त हारसँगै बेंगलोरको प्लेअफ सम्भावना पनि समाप्त भएको छ । यदि बेंगलोर विजयी भएको खण्डमा मुम्बईलाई नेटरनरेटमा पछि पार्दै प्लेअफमा स्थान बनाउने समिकरण थियो ।

गुजरातलाई जिताउन युवा ब्याटर शुभमन गिलले ५२ बलमा ५ चौका र ८ छक्कासहित १ सय ४ रनको अविजित इनिङ खेले । उनको यो लगातार दोस्रो शतक थियो । गिलले सनराइजर्स हैदराबादविरुद्ध पनि १ सय १ रनको शतकीय इनिङ खेलेका थिए ।

त्यसअघि घरेलु मैदान बेंगलोरमा टस हारेर पहिला ब्याटिङको निम्तो पाएको बेंगलोरले विराट कोहलीको शतकको सहयोगमा निर्धारित २० ओभरमा ५ विकेट गुमाउँदै १ सय ९७ रन बनाएको थियो । कोहलीले ६१ बलमा १३ चौका र १ छक्कासहित १ सय १ रनको अविजित शतकीय इनिङ खेलेपनि टोलीको हार टार्न सकेनन् ।

यो सतकसगै कोहली आइपिएलमा सर्वाधिक धेरै ७ शतक प्रहार गर्ने खेलाडी बनेका छन् । उनले क्रिस गेलको ६ वोटा शतकको कीर्तिमानलाई पछि पारेका हुन् ।

गुजरात १४ खेलमा १० मा जित र ४ मा हारसहित २० अंकका साथ शीर्षस्थानमा रह्यो । चेन्नई १४ खेलमा ८ मा जित र ५ मा हारसहित १७ अंकका साथ दोस्रो स्थानमा रह्यो । मंगलबार पहिलो क्वालिफायर चेन्नई र गुजरातबीच प्रतिस्पर्धा हुनेछ । विजेता टोली फाइनलमा पुग्दा पराजित टोलीले दोस्रो क्वालिफायर खेल्नेछ ।

लखनऊ १४ खेलमा ८ मा जित र ५ मा हारसहित १७ अंकका साथ तेस्रो स्थानमा रह्यो । मुम्बई इन्डियन्स १४ खेलमा ८ मा जित र ६ मा हारसहित १६ अंकका साथ चौथो स्थानमा रह्यो । एलिमिनेटर खेलमा लखनऊ र मुम्बईबीच बुधबार प्रतिस्पर्धा हुनेछ । शुक्रबार दोस्रो क्वालिफायरमा एलिमिनेटर विजेता र पहिलो क्वालिफायरमा पराजित हुने टोलीबीच प्रतिस्पर्धा हुनेछ । फाइनल आइतबार हुनेछ ।