आइपिएल : पन्जाब किंग्स दिल्ली क्यापिटल्ससँग १५ रनले पराजित

पन्जाबका लिभिङस्टोनले ४८ बलमा ५ चौका र ९ छक्कासहित सर्वाधिक ९४ रन बनाएपनि टोलीको जित दिलाउन सकेनन्

विहीबार, ०४ जेठ २०८०

दिल्लीले जितको लागि पेस गरेको २ सय १४ रनको विशाल बिजयी लक्ष्य पछ्याएको पन्जाबले निर्धारित २० ओभरमा ८ विकेट गुमाउँदै १ सय ९८ रन मात्र बनाउदा १५ रनले पराजित भएको छ ।

पन्जाबका लिभिङस्टोनले ४८ बलमा ५ चौका र ९ छक्कासहित सर्वाधिक ९४ रन बनाएपनि टोलीको जित दिलाउन सकेनन् । त्यस्तै अथर्व टाडेले ४२ बलमा ५ चौका र २ छक्कासहित ५५ रनमा रिटार्यहर्ट आउट भएका थिए । अन्य कुनैपनि पन्जाबी ब्याटरले राम्रो प्रदर्शन गर्न सकेनन् ।

सुस्त सुरुवात पन्जाबको लागि भारी पर्यो । सुरुवाती तीन ओभरमा १० रन मात्रै बनाएको थियो । पन्जाबका ओपनर प्रभसिम्रन १९ बलमा ४ चौकासहित २२, शाहरुख खान ६, साम करन ११, शिखर धवन, जितेश शर्मा र हरप्रीत ब्रार डक आउट भए ।

दिल्लीका ईशान शर्मा र एनरिच नोर्कियाले समान दुई विकेट लिए । खलिल अहमद र अक्षर पटेलले समान एक विकेट लिए ।

त्यसअघि हिमान्चल प्रदेशको धर्मशालामा टस हारेर पहिला ब्याटिङको निम्तो पाएको दिल्लीले निर्धारित २० ओभरमा २ विकेट गुमाउँदै २ सय १३ रन बनाएको थियो । दिल्लीको जितमा शीर्षक्रमका ब्याटर राइली रोसोउ ३७ बलमा ६ चौका र ६ छक्कासहित सर्वाधिक ८२ रनमा नटआउट रहँदै प्लेयर अफ द म्याच चुनिए ।

दिल्लीलाई ओपनर पृथ्वी शा र डेविड वार्नरले पहिलो विकेटका लागि १०.२ ओभरमा ९४ रनको साझेदारी गर्दै उत्कृष्ट सुरुवात दिलाएका थिए । साम करनको बलमा वार्नर शिखर धवनबाट ४६ रनमा क्याच आउट भए । वार्नरले ३१ बलमा ५ चौका र २ छक्का प्रहार गरे ।

पन्जाबका साम करनले ४ ओभरमा ३६ रन खर्चेर २ विकेट लिए । अन्य कुनैपनि बलरले विकेट लिन सकेनन् । दिल्लीले अन्तिम १२ बलमा ४१ रन जोडेको थियो ।

तपाईंको प्रतिकृया