आफ्नै विश्वकीर्तिमान तोड्दै कामिरिता शेर्पा २७औँ पटक सगरमाथाको चुचुरोमा

जेठ ३, २०८० बुधबार

२६औं पटकको आफ्नै विश्वकीर्तिमानलाई तोड्दै आरोही ५३ वर्षीय कामिरिता शेर्पाले २७ औं पटक सर्वोच्च शिखर सगरमाथाको सफल आरोहण गरेका छन् । उन्ले बुधबार बिहान ८ बजेर ३० मिनेटमा सर्वोच्च शिखरमा पाइला टेक्दै यो किर्तिमान बनाएका हुन् ।

यो आरोहण उनले सेभेन समिट ट्रेक्स प्रालिबाट गएका थिए र आफ्नै विश्वकीर्तिमान तोडेर विश्वलाई सुरक्षित आरोहणको सन्देश पनि दिएका छन‍् ।

सेभेन समिटका मिङ्मा शेर्पाले कामीरिता विश्वको हिरो भएको प्रतिक्रिया दिएका छन्। ‘यस हिसाबले उहाँ संसारको पहिलो व्यक्ति हुनुभयो। यो हामी नेपालीका लागि गौरवको कुरा हो’, उनले भने।

कामीरिताले सन् २०१८ मा २२औं पटक आरोहण गरी आप्पा शेर्पाको कीर्तिमान तोडेका थिए। त्यसयता उनले निरन्तर कीर्तिमान राख्दै आएका छन्। उनले गत वर्ष वैशाख २४ मा २६औं पटक आरोहण गरी आफ्नै रेकर्ड तोडेका थिए।

१९७० मा सोलुखुम्बुको दुर्गम गाउँमा जन्मेका उनी पारिवारिक रूपमै भरिया, गाइड, माउन्टेन क्याप्टेन हुँदै विख्यात आरोहीका रूपमा संसारभर चर्चित बनेका हुन्। उनका बाबु मिङ्मा शेर्पा सुरुवाती चरणका हिमाल आरोही थिए। उनले प्रथम सफल आरोही तेञ्जिङ नोर्गे शेर्पासँग आरोहण सिकेका थिए। उनका दाजु लाक्पारिता सातै महादेशका अग्ला हिमाल चढ्ने पहिलो शेर्पा हुन्। पारिवारिक वातावरणबाट भरिया, गाइड हुँदै आरोहण क्याप्टेनसमेत भएका कामीरिताको चाहना ५० वर्षको उमेरमा २५ पटक सगरमाथा आरोहण गरी कीर्तिमान बनाउने भन्ने थियो। उनी ५३ वर्षमा २७ पटक आरोहण गर्न सफल भएका छन्।

यो सिजनमा सगरमाथा आरोहणको ७० वर्षको इतिहासमा सबैभन्दा बढी ४४ दलका ९८ महिलासहित ४ सय ६७ जनाले आरोहण गर्दै छन्। पर्यटन व्यवसायी ल्हाक्पा सोनाम शेर्पाले पनि बुधबार बिहान ७ बजेर ३४ मिनेटमा सगरमाथा आरोहण गरेका छन्। उनी सगरमाथा चढ्ने पहिलो नेपाली महिला पासाङ ल्हामु शेर्पाका श्रीमान् हुन्।

वसन्त ऋतु सगरमाथा आरोहणको सिजन मानिन्छ। जलवायु परिवर्तनका कारण विश्व तापमानमा भएको वृद्धिले हिमालमा ढिलो हिउँ पर्न थालेपछि आरोहणको सिजन पनि परिवर्तन भइरहेको छ। पहिले आरोहणको सिजन शरद ऋतु हुन्थ्यो हाल वसन्त ऋतुमा सबैभन्दा आरोहण बढी हुने गरेको छ।

तपाईंको प्रतिकृया