वैशाख ३०, २०८० शनिबार

काठमाडौं : नेपाली कांग्रेसका नेता डा. शेखर कोइरालाले मानव तस्करी जस्तो घृणित कार्यमा संलग्न भएको घटनाले विश्व समुदायसामु देशको शिर निहुरिएको भन्दै ठगीमा संलग्नलाई कानुनी कठघरामा ल्याउनुपर्ने बताएका छन्।

शनिबार बिहान सामाजिक सञ्जालमार्फत उनले भनेका छन्,‘राज्यको जुनसुकै तह र तप्काको जो कोहीलाई पनि कानुनको कठघरामा ल्याएर तिनलाई कडा भन्दा कडा सजाय दिनुपर्दछ।’

नेपाल प्रहरीले अनुसन्धानकाक्रममा कांग्रेसका नेता एवम् पूर्वगृहमन्त्री बालकृष्ण खाण, नेपाल सरकारका सचिव टेकनारायण पाण्डेलगायतका व्यक्ति पक्राउ परेपछि कोइरालाले जुनसुकै तहमा भएपनि कानुनको कठघरामा ल्याएर कडाभन्दा कडा सजाय दिनुपर्ने बताएका हुन्।

कोइरालाले अगाडी भनेका छन्,‘यो देशको शासक र प्रशासकप्रति आम नागरिकको चरम अविश्वास बढ्दो छ, यसले हामीले दशकौं संघर्ष गरेर ल्याएको लोकतन्त्र र संविधानलाई असुरक्षित पारेको छ। अब समय आएको छ भ्रष्टाचारविरूद्ध आम नागरिकसँग एकाकार गर्दै राष्ट्रिय साझा चेतना अभियानको थालनी गर्ने र नेपाललाई भ्रष्टाचारको जालोबाट उन्मुक्ति दिने।’

एमालेका सचिव टोपबहादुर रायमाझीविरुद्ध पक्राउ पुर्जी जारी भएपछि फरार रहेका छन् भने एमालेले अनुसन्धानमा सहयोग पुगोस् भनेर निलम्बनसमेत गरेको छ। ठगी घटनामा प्रहरीले अनुसन्धान गरिरहेको समयमा कांग्रेसका पूर्वसांसद आङटावा शेर्पा पनि फरार भएका छन्। हिरासतमा रहेका पूर्वगृहमन्त्री खाण र बिचौलियाहरूबीच उनले मध्यस्थकर्ताको भूमिका खेल्न खोजेपछि प्रहरीले उनीमाथि निगरानी बढाएको छ। रकम फिर्ता दिने भन्दै खाणको प्रतिनिधि बनेर रामेछापका कांग्रेस नेता शेर्पा अभियुक्तलाई भेट्न प्रहरी कार्यालय पुगेका थिए। यसैगरी खाणकी पत्नी एवम् सांसद् मञ्जु खाणलगायतले पनि रकम बुझेको अडियो सार्वजनिक भएको छ। प्रहरीले उक्त अडियोबारे अनुसन्धान गरिरहेको जनाएको छ।

यसैबीच राजनीतिक दलका उच्च नेता र कर्मचारी संलग्नता देखिएपछि नागरिकहरू भ्रष्टाचारविरुद्ध उत्रिँदैछन्। राजनीति दलबाट प्रहरीलाई अनुसन्धानमा दबाब र प्रभाव नहोस् भनेर खबरदारीका लागि शनिबार काठमाडौंलगायत विभिन्न जिल्लाका शहरमा प्रदर्शन हुन लागेको हो।