सोमबार l २७ चैत, २०७९

सुदूर पश्चिम प्रदेश सरकार सामाजिक विकास मन्त्रालयले उपलब्ध गराएका एम्बुलेन्स ग्रामीण सडकमा सञ्चालनमा समस्या आएको भन्दै तीन वर्षमै फिर्ता गरिएका छन् ।

पञ्चेश्वर गाउँपालिका उपाध्यक्ष बीना भट्टले प्रदेश सरकारले उपलब्ध गराएको एम्बुलेन्स बेलाबेला बिग्रने र मर्मत खर्च धेरै नै आउन थालेपछि कार्यपालिकाको बैठकबाट निर्णय गरी फिर्ता पठाएको बताइन् ।

सामाजिक विकास मन्त्रालयले १७ कात्तिक २०७६ मा गाउँपालिकालाई हस्तान्तरण गरेको एम्बुलेन्स पहाडी जिल्लाका ग्रामीण सडकमा सञ्चालन गर्न असहज हुने, एकपटक बिरामीलाई बोकेको अवस्थामा मर्मत गर्नैपर्ने र मर्मत खर्च धेरै नै आउन थालेपछि फिर्ता पठाएको बताइएको छ l

‘गाउँपालिकाले आफ्नै बजेटबाट एम्बुलेन्स किन्ने तयारी थालेका छौँ । ग्रामीण सडकमा सहजरूपमा सञ्चालन हुने एम्बुलेन्स किन्छौँ,’ बिना भट्टले भनिन् ।

डिलासैनी गाउँपालिकाकाले पनि प्रदेश सरकारले उपलब्ध गराएको एम्बुलेन्स मन्त्रालयलाई नै फिर्ता पठाउने निर्णय गरेको प्रवक्ता यज्ञ भट्टले बताए । बेलाबेलामा बिग्रने र मर्मत खर्च धेरै आउने समस्याले गर्दा एम्बुलेन्स एक वर्षदेखि ठप्प थियो ।

सुदूरपश्चिम प्रदेश सरकारको सामाजिक विकास मन्त्रालयले तीन वर्षअघि प्रदेशका १६ वटा स्वास्थ्य संस्था तथा अस्पताललाई एम्बुलेन्स उपलब्ध गराएको थियो ।