२०७९ चैत १६ गते

बुधबार बिहान ९ बजे पाल्पाको रानीमहल दरबार पुगेका एमाले अध्यक्ष एवं पूर्वप्रधानमन्त्री केपी शर्मा ओलीले रानीमहल प्रांगणबाट भन्छन् ‘प्रेम गर्ने मान्छेहरूका लागि त रानीमहल तीर्थस्थल नै रहेछ ।’ उनि आफ्नी धर्मपत्नि राधिका शाक्यसाथ त्यहाँ पुगेका थिए l

यसअघि हेलिकोप्टरबाट हेरेको जानकारी दिँदै रानी महलमा प्रवेश गरेपछि पीर चिन्ता सब हराएको उनको भनाइ थियो । ‘रानीमहल आएपछि सबै किसिमको पीर चिन्ता हराउने रहेछ,’ ओलीले भने, ‘बाचुञ्जले मात्र होइन प्रेम मरेपछि पनि कायम राख्नुपर्ने रहेछ भन्ने सन्देश रानीमहल दरबारले दिएको छ ।’

कालीगण्डकीको भेलले रानीमहल दरबारको जग कटान गरेको सुनेको भन्दै उनले जग कटान रोक्न, तटबन्ध गर्न आवश्यक परेकाले रकम विनियोजन गरी इतिहास, प्रेमको तीर्थस्थल बचाउन सरकारलाई अनुरोध गरे ।

रानीमहल दरबार राणा खड्गशमशेरले रानी तेजकुमारीको सम्झनामा निर्माण गरेका हुन् । रानीमहल दरबार १९४९ सालमा निर्माण सुरु गरी १९५४ सालमा पूरा भएको थियो । रानीमहल दरबार कालीगण्डकी नदीको किनारामा २४ रोपनी क्षेत्रफलमा फैलिएको छ । रानीमहल दरबार नेपालका सय पर्यटकीय गन्तव्यका रूपमा सूचीकृत रहेको छ भने लुम्बिनी प्रदेश सरकारले प्रमुख पर्यटकीय गन्तव्यका रूपमा यसलाई राखेको छ ।

ओली दम्पती टिकट काटेर दरबार छिरेका थिए । ओलीसहितको टोलीलाई एमाले तानसेन नगरपालिका, बगनासकाली गाउँपालिका र एमाले नागरिक उड्डयन तथा पर्यटन बिभाग पाल्पाले सम्मान गरेको थियो ।