वोडीआइ को बरियता क्रममा नेपालको स्थानमा सुधार

बुधबार ०१ चैत, २०७९

नेपाली क्रिकेट टोलीले नयाँ एकदिवसीय विश्व वरियतामा सुधार गरेको छ । अन्तर्राष्ट्रिय क्रिकेट परिषद् (आइसिसी) का अनुसार नयाँ वरियतामा नेपाल १६ औँ स्थानमा उक्लिएको हो ।

विश्वकप लिग–२ मा लगातार उच्च प्रदर्शन गरेपछि नामिबियालाई पछि पार्दै नेपाल १६ औँ स्थानमा उक्लिन सफल भयो । यसअघि नेपाल १७ औँ स्थानमा थियो । आइसिसीले मंगलबार अपडेट गरेको ओडिआईतर्फको घरेलु मैदानमा स्कटल्याण्ड र नामिबियासँगको लिग–२ खेल्नुअघि नेपाल १९ औँ स्थानमा थियो ।

त्यसपछिका ११ खेलमा नेपालले १० मा जित निकाल्दै आफूलाई तीन स्थान सुधार गरेको हो । सात देश सम्मिलित लिग–२ मा नेपाल ३५ खेलबाट ३८ अंक जोड्दै चौथो स्थानमा छ । लिग–२ मा शीर्ष तीनमा रहेर विश्वकप छनोटमा स्थान बनाउन नेपालले बिहीबार हुने अन्तिम खेलमा यूएईलाई हराउनुपर्नेछ ।

नेपालभन्दा पछि रहेको नामिबिया १७ औँ, अमेरिका १८ औँ, यूएई १९ औँ र पपुवा न्युगिनी २० औँ स्थानमा छन् । नयाँ ओडिआई वरियतामा भारत शीर्ष स्थानमा रहेको छ । त्यस्तै, अस्ट्रेलिया दोस्रो स्थानमा छ ।

एसोसिएट राष्ट्रतर्फ स्कटल्याण्ड सबैभन्दामाथि १२ औँ स्थानमा छ । विश्वकप सुपर लिग खेलिरहेको नेदरल्याण्ड्स भने १४ औँ स्थानमा छ । लिग–२ को दोस्रो स्थानमा रहेको ओमान १५ औँ स्थानमा छ ।

तपाईंको प्रतिकृया