लेखन प्रतियोगिता : ‘नेसनवाइड जर्नालिष्ट फेलोसिप प्रोग्राम २०२३’ सुरु

In Headlines
March 6, 2023
Sushil Paudyal

_{^{Confederation of Bank and Financial Institutions,Nepal (CBFIN)}}

आइतबार, २१ फागुन २०७९

वर्तमान अवस्थामा देखिएका आर्थिक समस्याहरूको समाधान र यसको रोडम्यापबारे राष्ट्रियस्तरमा बहस पैरवी गर्दै समाधानको निचोड निकाल्नका लागि ‘नेसनवाइड जर्नालिष्ट फेलोसिप प्रोग्राम २०२३ ’ सुरु गरिएको छ ।

यो कार्यक्रम नेपाल पत्रकार महासंघसँगको सहकार्यमा बैंक तथा वित्तीय संस्था परिसंघ नेपाल (सिबिफिन) र नेपाल बिजनेस इन्टिस्च्युटले पत्रकारहरूबीच राष्ट्रव्यापी लेख लेखन प्रतियोगिता गराउने छ l

पत्रकार महासंघका अध्यक्ष बिपुल पोख्रेलले जानकारी दिए अनुसार वर्तमान आर्थिक परिदृश्य र समृद्धिको मार्गचित्र विषयमा २५०० शब्द नबढ्ने गरी देशभरका पत्रपत्रिका, रेडियो, टेलिभिजन, अनलाइन सञ्चारमाध्यममा कार्यरत पत्रकारहरू र स्तम्भकारहरूले लेख पठाई प्रतियोगितामा भाग लिन सक्नेछन् l

नेपाल सरकार सहितको सहभागितामा २०८० साल वैशाख पहिलो हप्ता काठमाडौंमा आयोजना हुने नेपाल बिजनेस समिटको पूर्वसन्ध्यामा जर्नालिष्ट फेलोसिप कार्यक्रम आयोजना गरिएको नेपाल बिजनेस इन्स्टिच्युटका अध्यक्ष विशाल गैरेले जानकारी दिए । उनका अनुसार अर्थतन्त्रका प्रमुख चुनौती, अवसर र भावी रोडम्यापबारे पत्रकारहरुकोे सृजनशील क्षमताबाट प्राप्त लेखलाई प्रोत्साहन गरी राष्ट्रिय अर्थतन्त्रको सवलीकरण गर्ने उद्देश्यले यो प्रतियोगिता आयोजना गरिएको बताइएको छ ।

नेपाल पत्रकार महासंघका महासचिव रोशन पुरीले कुनै पनि सञ्चारमाध्यममा कार्यरत पत्रकारहरूले यो प्रतियोगितामा भाग लिन सक्ने बताए । सहभागी पत्रकारले आफू कार्यरत सञ्चार माध्यमको पुष्टि हुने पत्रकार परिचयपत्र, नियुक्तिपत्र वा मिडिया हाउसको पत्र (कुनै एक) सहित कतै पनि प्रकाशित नभएको खोजमुलक र तथ्यपरक लेख अनलाइनमार्फत चैत्र १३ गतेभित्र आवेदन दिन सकिने छ ।

बैंक तथा वित्तीय संस्था परिसंघ नेपाल (सिबिफिन)का महानिर्देशक डा. गोपाल तिवारीले लेखको मौलिकता, तथ्यपरकता र लेखले औँल्याएका भावी मार्गदर्शनलाई छनोटको आधार बनाइने जानकारी दिए । अनलाइन माध्यमबाट प्राप्त लेखहरुलाई पाँच सदस्यीय छनोट समितिले विभिन्न मापदण्डका आधारमा छनोट गर्नेछ ।

उक्त लेखहरु मध्येबाट उत्कृष्ट १५ लेख (लेखक) लाई क्रमशः रु. १ लाख, रु. ७५ हजार, रु. ५० हजार, रु.२५ हजार र रु.१५ हजारका दरले सम्मान गरिने छ । साथै उत्कृष्ट १० लेखलाई प्रति लेखबापत रु. १० हजारका दरले नगद तथा प्रमाणपत्रमार्फत प्रोत्साहन रकम उपलब्ध गराइने आयोजकले जनाएका छन् । छनोटमा परेका लेखकहरुलाई प्रधानमन्त्रीको हातबाट प्रमाणपत्रका साथै नगद हस्तान्तरण गरिने समेत आयोजकले जनाएको छ ।

तपाईंको प्रतिकृया