शनिबार, फागुन १३, २०७९ ll आज बिहान कांग्रेस केन्द्रीय कार्यालय सानेपामा बसेको केन्द्रीय कार्यसम्पादन समितिको बैठकले पार्टीका बरिष्ठ नेता रामचन्द्र पौडेललाई रास्ट्रपतिको उम्मेदवार बनाउने निर्णय गरेको छ।

राष्ट्रपतिको निर्वाचन यही २५ फागुनमा हुँदैछ l अस्ति १० गते मतदाता नामावली प्रकाशन भैसकेको र आज १३ फागुन शनिबारका दिन उम्मेदवारी मनोनयनपत्र दर्ता गर्नुपर्ने निर्वाचन आयोगले कार्यतालिका सार्वजनिक गरिसकेको छ ।

शेरबहादुर देउवाले पौडेललाई राष्ट्रपति उम्मेदवार बनाउने प्रस्ताव गरे सगै पौडेल ८ दलीय गठबन्धनका साझा उम्मेदवार बन्ने भएका छन्।

यस निर्णय सगै मुलुकले गणतान्त्रिक नेपालको तेस्रो राष्ट्रपतिको रुपमा रामचन्द्र पौडेललाई पाउने पक्का जस्तै छ l रामवरण यादव मुलुकको पहिलो र विद्यादेवी भण्डारी दोस्रो राष्ट्रपति बनेका थिए।

नेपाली साहित्यमा एमए र संस्कृतमा शास्त्री गरेका रामचन्द्र पौडेललेको लामो राजनैतिक इतिहास छ l उनी राजा महेन्द्रले २०१७ सालमा ‘कू’ गरेपछि वामपन्थी विद्यार्थी राजनीतिको झुकाव छाडेर नेपाली कांग्रेससँग जोडिएका थिए। उनले राजनीतिक जीवनमा १३ वर्ष जेल जीवन बिताए र साथै तनहुँबाट ६ पटक सांसदको रुपमा निर्वाचित भएका हुन् l

पौडेल प्रतिनिधि सभाको सभामुख र उपप्रधानमन्त्री रहिसकेका छन्। उनी नेपाली कांग्रेसको पूर्व उपसभापति पनि हुन्।

लामो राजनीतिक जीवनमा मुलुकको सर्वोच्च कार्यकारी पदमा पुग्न नसकेका पौडेल प्रति देशभरका कांग्रेसी नेता तथा कार्यकर्ताको सहानुभूति रहने गरेको छ। राष्ट्रपतिका रूपमा राष्ट्रप्रमुखको जिम्मेवारी सम्हालेसँगै पौडेलको लामो राजनीतिक जीवनले विश्राम लिनेछ।