डा.सन्दुक रुइतलाई बहराइनमा ‘इसा अवार्ड’ प्रदान

In Headlines
February 22, 2023
Sushil Paudyal

बुधबार, फागुन १०, २०७९ ll तिलगङ्गा आँखा प्रतिष्ठानका कार्यकारी निर्देशक तथा वरिष्ठ आँखा रोग विशेषज्ञ डा. सन्दुक रुइत बहराइनमा ‘इसा अवार्ड’ बाट सम्मानित भएका छन् ।

एउटा कार्यक्रममा उनलाई बहराइनका राजा सेख हमद विन इसा अल खालिफाले अवार्ड प्रदान गरेका हुन् l तिलगङ्गा आँखा प्रतिष्ठानका जनसम्पर्क अधिकृत सुनिता केसी अनुसार राजा खालिफाले डा रुइतलाई १० लाख डलर बराबरको उक्त अवार्र्डसहित सम्मानपत्र प्रदान गरेका हुन् ।

‘इसा अवार्ड फर सर्भिस टु ह्युमानिटी’ संस्थाले उनलाई आँखा उपचार गरेर अन्धोपन हटाउन खेलेको भूमिकाको योगदान गर्दै अवार्ड प्रदान गरेको हो । गत माघ महिनामा डा. रुइतलाई उक्त संस्थाले इसा अवार्ड दिने घोषणा गरेको थियो ।

उक्त अवार्डका लागि एक सय ४५ व्यक्ति तथा संस्थाले मनोनयनमा दर्ता गराएका थिए । अन्तिम छ व्यक्ति तथा संस्थाको सूचीमा परेर उनी छनोट भएका हुन् । बहराइनका राजा सेख हमद विन इसा अल खालिफाले सन् २००९ मा पूर्वराजा सेख इसा बिन सलमान अल खालिफाको नाममा स्थापना गरेको ‘इसा अवार्ड फर सर्भिस टु ह्युमानिटी’ संस्थाले अवार्ड प्रदान गर्दै आएको छ ।

डा.रुइतले मोतियाविन्दु उपचार गर्ने सरल विधि विकास गरेका थिए। उनले प्रतिष्ठानमा अन्धोपन हटाउनका लागि आँखामा हाल्ने अन्तर्राष्ट्रियस्तरको लेन्स ‘इन्ट्राअकुलर लेन्स’ उत्पादन गर्दै आएका छन्।

यसभन्दा अगी डा रुइतले सन् २००६ मा रमन म्याग्सेसे पुरस्कार, सन् २०१८मा भारत सरकार द्वारा पद्मश्री र सन् २०१९ मा नेपाल सरकार द्वारा प्रधानमन्त्री राष्ट्रिय प्रतिभा पुरस्कार बाट सम्मानित भैसकेका छन् l

तपाईंको प्रतिकृया