दोस्रो ट्वान्टी–२० खेलमा भारतको न्युजिल्याण्ड माथि ६ विकेटको जीत

In Headlines, खेल
January 30, 2023
Sushil Paudyal

लखनउमा भएको दोस्रो ट्वान्टी–२० खेलमा घरेलु टोलीले भारतले न्युजिल्याण्डलाई ६ विकेटले पराजित गरेको छ । यो जितसँगै भारतले तीन खेलको सिरिजमा १–१ को बराबरी गरेको छ ।

पहिले ब्याटिङ गरेको न्युजिल्याण्डले २० ओभरमा आठ विकेट गुमाएर ९९ रन बनाएको थियो । न्युजिल्याण्डका कुनै पनि ब्याट्सम्यानले ठूलो इनिङ खेल्न सकेनन् । भारतको जितमा सूर्यकुमार यादवले सर्वाधिक २६ रन बनाए। ३१ बलमा १ चौकासहित उनी अविजित रहे। यस्तै हार्दिक पान्ड्या २० बलमा १ चौकासहित १५ रनमा अविजित रहे।

सानो स्कोर भए पनि न्युजिल्यान्डका बलरहरूले कडा संघर्ष गर्दै खेललाई अन्तिम ओभरमा पुर्‍याएका थिए । भारतलाई जितको लागि अन्तिम ६ बलमा ६ रन आवश्यक थियो। तीव्र गतिका बलर ब्लेयर टिकनरले पहिलो पहिलो बलमा हार्दिक पान्ड्यालाई एक रन दिए। दोस्रो बल सूर्यलाई डट राखे। तेस्रो बलमा कट एण्ड बोल्ड गर्न चुकेका थिए। चौथौ बलमा एक रन दिएपछि दुई बलमा तीन रन आवश्यक थियो। पाँचौं बलमा सूर्यले चौका हान्दै रोमाञ्चक जित दिलाए।

अब तेस्रो तथा अन्तिम खेल बुधबार अहमदाबादमा हुनेछ।

तपाईंको प्रतिकृया