बुधबार हैदारावादमा भएको पहिलो एक दिवसीय खेलमा घरेलु टोली भारतले न्यूजिल्याण्डलाई १२ रनले हराउँदै तीन खेलको सिरिजमा १-० को अग्रता बनाएको हो।

भारतको जीतमा दोहोरो शतक बनाउने युवा ब्याट्सम्यान शुभमन गिल नायक बने । उनले मात्र १४९ बलमा २०८ रन बनाउन सफल भए । गिलले भारतको पारीमा एक्लैले कूल स्कोरको ५९.७७ प्रतिशत रन बनाएका थिए । अन्य कुनै ब्याट्सम्यानले अर्धशतकसमेत बनाउन सकेनन् । यस पारीका दौरान गिलले तीन विश्व कीर्तिमान बनाएका छन् ।शुभमन एकदिवसीय क्रिकेटमा दोहोरो शतक लगाउने भारतका पाँचौँ ब्याट्सम्यान हुन् । कूल ८ जना ब्याट्सम्यानले १० वटा दोहोरो शतक बनाएका छन् । यसमध्ये गिल उपलब्धि हासिल गर्ने सबैभन्दा युवा खेलाडी बनेका छन् । उनले २३ वर्ष १३२ दिनको उमेरमा दोहोरो शतक बनाएका हुन् । यसअघि ईशान किशनले २४ वर्ष १४५ दिनमा दोहोरो शतक बनाएका थिए । गिलले एकदिवसीय क्रिकेटमा १ हजार रन पनि पुरा गरेका छन् । भारतीय खेलाडीहरूमध्ये सबैभन्दा कम पारीमा उनले यो कोशेढुंगा पार गरेका हुन् । उनले १९ एकदिवसीयका १९ पारीमा १ हजार पुरा गरे । यो रेकर्ड विराट कोहली र शिखर धवनको नाममा रहेको थियो । दुवैले २४–२४ पारीमा १ हजार रन बनाएका थिए । १९ पारीमा उनले सबैभन्दा धेरै रन बनाउने कीर्तिमान पनि उनले तोडेका छन् ।

अन्य भारतीय ब्याटरको भने प्रदर्शन राम्रो हुन सकेन। कप्तान रोहित शर्माले ३४ रन बनाउँदा सूर्यकुमार यादव ३१, हार्दिक पान्ड्या २८, वासिन्टन सुन्दर १२, विराट कोहली ८, ईशान किशन पाँच र शार्दुल ठाकुर ३ रनमा आउट भए।