कार्तिक ०९, आइतवार,

काठमाडाैं ।

आर्थिक, सांस्कृतिक एवं ऐतिहासिक महत्त्वसित जोडिएका जग्गाजमिनहरू धमाधम ठूला व्यापारिक घराना तथा भूमाफियाहरूको गिद्धे नजरमा परेको अवस्थामा जनजागरण पार्टीको तर्फबाट खबरदारी भएको छ ।

आज उक्त पार्टीका अध्यक्ष डा. बिपि खनालद्वारा हस्ताक्षरित प्रेस विज्ञप्ति जारी गर्दै पार्टीको फेसबुक पेजमा प्रवक्ताद्वारा विदुर अधिकारीद्वारा यसको जानकारी गराइएको छ ।

यहाँ पढ्नुहोस् जनजागरण पार्टीको प्रेस विज्ञप्ति:

प्रेस विज्ञप्ति

यससम्बन्धमा, करिब एक शताब्दीदेखि नै नेपाली मुस्लिम समुदायको प्रयोजनमा रहेको काठमाडौं सुन्धारा स्थित नेपाल मदिनी मस्जिदमा गरिएको तोडफोड र जग्गामाथि गरिएको अतिक्रमण निन्दनीयमात्रै छैन, यसबाट अल्पसंख्यक समुदायप्रतिको उपेक्षा र धार्मिक द्वन्द्व सृजना गराउने दुष्प्रयाससमेत प्रष्ट हुन्छ । मुसाफिर स्थलका रूपमा प्रयोग हुँदै आएको जग्गा र भवनका बारेमा लामो समयदेखि मुद्दा चल्दै आएको भए तापनि धार्मिक आस्थासित जोडिएको विषयमा राज्यशक्तिको आड र पहुँचका भरमा गरिएको अतिक्रमणबारे स्थानीय सरकारले असंवेदनशीलता प्रदर्शन गरेको छ ।

आर्थिक, सांस्कृतिक एवं ऐतिहासिक महत्त्वसित जोडिएका जग्गाजमिनहरू धमाधम ठूला व्यापारिक घराना तथा भूमाफियाहरूको गिद्धे नजरमा पर्दैछन्, र त्यस्ता ठाउँका धार्मिक–सांस्कृतिक धरोहरहरू कसरी पहुँचवाला मानिसहरूका निसानामा पर्दैछन् भन्ने पछिल्लो उदाहरण यो हो । त्यसर्थ जनजागरण पार्टी नेपाल पीडित पक्षसँग ऐक्यबद्धता जाहेर गर्दछ ।

आक्रमणमा परेको स्थानको सम्बन्धमा नक्कली वैधानिकता खडा गरी अल्पसंख्यक धार्मिक समुदायका विरुद्धमा चालिएको उक्त कदम तत्काल रोकेर स्वतन्त्र न्यायिक छानबिन गरी दोषीउपर सख्त कार्वाही गरियोस् र पीडित पक्षलाई उचित क्षतिपूर्ति दिलाउने काम तुरुन्तै गरियोस् भनी नेपाल सरकारसमक्ष अपील गर्दछौं ।

सेवामा,

डा. बि.पी. खनाल
केन्द्रिय अध्यक्ष, जनजागरण पार्टी नेपाल

……………………………………………………………………………………………………

यसबारे अन्तरधार्मिक शान्ति महासंघले पनि कडा प्रेस विज्ञप्ति निकालेको छः https://khabardainik.com/3520