विवेकशील साझा पार्टीले आफ्नो नाम फेर्यो, ‘विवेकशील’ पछाडि सर्‍यो

काठमाडाैँ, १४ वैशाख

पूर्वपत्रकार रविन्द्र मिश्रले नेतृत्व गरेको विवेकशील साझा पार्टीले आफ्नो नाम फेरेको छ ।

अब पार्टीको नाम ‘साझा विवेकशील पार्टी’ कायम गरिएको छ । पार्टीको नाममा रहेको विवेकशील शब्दलाई पछाडि सारिएको छ ।

पार्टी प्रवक्ता सूर्यराज आचार्यले शनिवार प्रेस विज्ञप्ति जारी गर्दै नाम परिवर्तन भएको जानकारी दिएका छन् ।

देखिएको अन्योल र भ्रम चिर्न त्यसले सिर्जना गरेका प्राविधिक जटिलताहरूलाई सहज बनाउन तथा धेरै शुभेच्छुकहरूको अनुरोधलाई आत्मसात गर्न पार्टीले आफ्नो नाम ‘विवेकशील साझा पार्टी’बाट ‘साझा विवेकशील पार्टी’मा परिवर्तन गर्ने निर्णय गरेको छ ।’

यस्तै, पार्टीले आउँदा दिनहरूमा आफ्ना गतिविधिलाई मूलत: भ्रष्टाचार विरोधी अभियानमा केन्द्रीत गर्ने पनि उल्लेख गरेको छ ।

देशको रुपान्तरणको सोच र अभियानमा युवाहरुको यथोचित प्रतिनिधित्व सुनिश्चित गर्न पार्टीले तल्लो तहदेखि केन्द्रीय नेतृत्वसम्म युवाहरूका लागि ४० प्रतिशत स्थान आरक्षण गर्ने निर्णय गरेको प्रवक्ता आचार्यले जनाएका छन् ।

‘विदेशमा रहेका पार्टीका सदस्यहरूलाई ‘विशेष प्रदेश’को मान्यता दिने, पार्टीको निर्वाचनमा उनीहरूलाई मतदानको अधिकार दिने, विदेशका पार्टी आवद्ध सद्भाव समूहहरूले पार्टीको महाधिवेशनमा प्रतिनिधहरू पठाउन सक्ने र सद्भाव समूहरूको अन्तराष्ट्रिय सञ्जालका संयोजकलाई पार्टीको पदेन केन्द्रीय सदस्य बनाउने निर्णय पनि गरिएको छ’, विज्ञप्तिमा थप भनिएको छ ।

उसले आर्थिक आधारबिना पार्टी निर्माण नसक्ने भन्दै “दिनको एक कप चिया कम पिउँ, बचेको रकम साझा विवेकशीललाई सहयोग गरौँ” भन्ने अभियान पनि सञ्चालन गर्ने भएको छ।