• रेशम चौधरीसहित ११ जनालाई जिल्ला अदालतले जन्मकैदको सजाय सुनाएपछि कैलालीको टीकापुरमा उच्च सुरक्षा सतर्कता बढाइएको छ । इलाका प्रहरी कार्यालय टीकापुरका प्रमुख शिवबहादुर सिंहले व्यापक रूपमा सुरक्षाकर्मी परिचालन भएको बताउनुभएको छ । टीकापुर बजारक्षेत्रका चोकहरूमा सशस्त्र र नेपाल प्रहरी परिचालित भएपछि सर्वसाधारणको चहलपहल निकै कम भएको छ ।

यसैबिच, सबैलाई निःसर्त थुनामुक्त गर्न थारूसम्बद्ध संघर्ष समितिले माग गरेको छ

थारू सम्बद्ध संघर्ष समितिले रेशम चौधरीसहित सबै ११ जनालाई निःसर्त थुनामुक्त गर्न माग गरेका छन् । थरूहट संघर्ष समिति कैलाली, थरूहट थारूवान संघर्ष समिति कञ्चनपुर, थारू कल्याणकारिणीसभा कैलाली र थारू कल्याणकारिणीसभा कञ्चनपुरले संयुक्त विज्ञप्तिमार्फत भनेका छन्, ‘माननीय रेशम चौधरीलगायत ११ जना निर्दोष भएकाले थुनामुक्त गर्न राज्यको ध्यान जानु जरुरी छ । सामाजिक सद्भाव कायम गर्ने हो भने निजहरूको मुद्दालाई राजनीतिक मुद्दाका रूपमा लिई निसर्त थुनामुक्त गर्ने वातावरण सिर्जना गर्न राज्यसँग आग्रह गर्दछौँ ।’

अर्कोतर्फः ढिलै भए पनि फैसला स्वागतयोग्य छ । न्याय पाएको महसुस भएको छ । आपराधिक मुद्दा भएकाले यसलाई राजनीतिक मुद्दा बनाइनु हुँदैन, दोषीलाई कारबाही हुनुपर्छ भनेर हामीले लामो समय न्यायको लडाइँ लडेका थियौँ । कारबाही हुने निर्णयले खुसी भएको छु । फरारलाई पनि कारबाहीको दायरामा ल्याउनुपर्छः जंगबहादुर साउद, हत्या गरिएका बालक टेकबहादुर साउदका बाजेले बताएका छन् ।

यसरी टीकापुर घटना राजनीतिक थियो वा अापराधिक थियो भनी मतभेद देखिएको छ । यसमा जिल्ला अदालतले फैसला दिइसकेको अवस्थामा अब पुनरावेदन र सर्वोच्चमा मुद्दा लगिएमा मात्र कानुनी समाधान अाउने देखिन्छ अन्यथा विवाद र द्वन्द्वको अवस्था अाउन सक्छ । सबै पक्ष संयमित भइ, उपचारको खोजी गर्नुपर्ने देखिन्छ ।