माघ २६, शुक्रवार

ललितपुर

इसाई अास्था मतको कारण समाज सेवा गर्न उत्प्रेरित संघ संस्थाहरूको साझा सञ्जाल गैरसरकारी इसाई संस्था संगठन सञ्जाल नेपाल (नेकोन) ले हिजो एक पत्रकार भेटघाट तथा अवधारणा प्रसारण कार्यक्रम अायोजन गरी अाफ्नो अवधारणा सार्वजनिक गरेको छ । सामाजिक संघसंस्थाले गरेका असल कामलाइ पूर्णरूपमा नजरअन्दाज गर्दै बहुधा भ्रामक र तथ्यहीन समाचार मात्र मिडियामा छाउने तथा सरकारी निकायबाट पनि बारम्बार बाधा पुग्ने जस्ता विषयमा अन्तरक्रियापछि उक्त अवधारणा जारी गरिएको हो ।

पढ्नुहोस्, उक्त अवधारणा पत्र, जस्ताको त्यस्तै ।

१. नेकोन परिचयः नेकोन राष्ट्र निर्माणका निम्ति एकतावद्ध तथा रूपान्तरित इसाई गैरसरकारी संस्थाहरूको दर्शन लिई, इसाई मतमा आधारित भई नेपालमा सेवा कार्य गर्ने संघसंस्थाहरूको एक साझा मञ्चका रूपमा सन् २०१८ मा स्थापित सञ्जाल हो । यस्ता संघसंस्थाहरूको साझा आवाज, सशक्तिकरण, क्षमता अभिवृद्धि, ज्ञान तथा दक्षता आदानप्रदान गरी उनीहरूको कार्यमा हरप्रकारले सहायता पुर्याउनु नेकोनको उद्देश्य हो । यसकारण यस्ता गैरसरकारी संघसंस्थाहरुको पक्षमा चासो, वास्ता राख्नु र समाज सेवा गर्न पाउने उनीहरूको हकको पक्षमा उभिनु नेकोनको एक प्रमुख जिम्मेवारी पनि हो ।

२. समस्या कथनः यसै सन्दर्भमा, विगत केही वर्षदेखि इसाई आस्था भएका ब्यक्तिहरुले नेतृत्व गरेका गैरसरकारी संघसंस्थाहरूका कार्यलाई एकपक्षीय रूपमा, नकारात्मक रूपमा, आधारहीन लाञ्छना लगाई संचार माध्यममा समाचार प्रकाशित हुने अनि अर्काे तिर विधिवत रूपमा दर्ता भई सरकारी निकायहरूबाट पनि सम्बन्धित क्षेत्रमा कार्य गर्न अनुमति लिई नियमानुसार कार्य गर्दा पनि नियम कानुनको पक्षपात पूर्ण रूपमा व्याख्या गरी संघसंस्थामाथि निगरानी,  काम कार्यबाहीमा बाधा, दर्ता नविकरणमा ढिलाइ र अस्वीकृति तथा अन्य बन्धनकारी आदेशहरू जारी हुने घटना क्रम बढ्दो छ ।

विशेष गरी केही महिना अघि टिच नेपाल नामक संस्थाका बारेमा जुन तवरले सञ्चार माध्यमहरुले एउटा विज्ञापन छापेको कुरालाई लिएर अतिरञ्जित रूपमा नकारात्मक सूचना प्रवाह गरियो र जिल्ला प्रशासान कार्यालय ललितपुरबाट संस्थाको काम तथा खाता रोकावट गरिएको छ । एक स्वतन्त्र, धर्मनिरपेक्ष गणतन्त्रात्मक राष्ट्रबाट सामाजिक संस्थामाथि गरिएका यस प्रकारका काम कारबाही न्यायोचित होइन भन्ने हाम्रो ठहर छ ।

३. नेकोनको धारणाः सरकारले आफूले नगरेका वा गर्न नसकेको समुदायका खाँचोमा परेका व्यक्तिहरूलाई सेवा गर्नका लागि गैरसरकारी संघसंस्था अस्तित्वमा रहन्छन् । सरकारबाट गरिने वा गरिनुपर्ने कतिपय सेवामा सीमितता रहने हुनाले नै जनस्तरबाट, समान चासो र सोच भएका मानिसहरू मिली यस्ता गैरसरकारी निकायहरूबाट सेवा कार्य गरिन्छ । यस्ता पवित्र भावनाका साथ संघसंस्थाबाट गरिने सेवा कार्यलाई पनि नकारात्मक रूपमा हेर्नु वा देख्नु गम्भीर दृष्टिदोष हो ।

सञ्चार जगतबाट पनि संघसंस्थाका परोपकारी कार्यप्रति कत्ति पनि सहृदयता नराखी, सोधखोज अनुसन्धान र प्रमाण बिनै नकारात्मक समाचार सम्प्रेषण गर्नु दुःखद कुरा हो । समाज सेवा जस्तो पवित्र कार्यमा प्रतिबद्ध यस्ता संघसंस्थाप्रति जुनसुकै निकाय र कोणबाट आउने आधारहीन कदम तथा भ्रामक समाचारप्रति नेकोन गम्भिर चासो र चिन्ता व्यक्त गर्दछ ।

यसकारण, समाजका विभिन्न क्षेत्रमा सेवा गर्ने इसाई बिस्वासमा आधारित गैरसरकारी संघसंस्था प्रति सरकारी निकाय तथा संचार क्षेत्रले असल भरोसा राखी, निष्पक्ष रूपमा, सत्य तथ्य बुझेर मात्र निर्णय लिन तथा समाचार सम्प्रेषण गरिदिनुहुन नेकोन हार्दिक अनुरोध गर्दछ ।

धन्यवाद  ।

कृष्णमान शाक्य                                             जगदिश पोख्रेल

राष्ट्रिय संयोजक                                           संचार संयोजक

मितिः २०७५।१०।२५